مزكرات أم

مشاركة قارئة

الأمومة من أجمل النعم الخصنا بيها ربنا كنساء وأكيد احنا ممتنين جدا ليها مافي حاجه بتساوي ضحكة أولادنا ولا فرحتنا بنجاحهم او تفوقهم، احنا بنحبهم في كل المراحل وكل الظروف حب نقي جدا غير مشروط ما بتكرر نفسه مع أي شخص تاني.

أحيانا واحنا بنمارس مهمتنا العظيمة دي والما ساهله ابدا زي ما كتير بتخيل، بتبادر لاذهانا سؤال او بتبادر لي انا كام نفس السؤال كل مره وبتردد اقوله يمكن دي مساحة مريحه بالنسبه لي اني اعبر بي حريه بدون أحكام وبدون توصيات بدون ما احس اني ام مقصره كيف اقدر أسأل عن وين انا ووين أحلامي واهتماماتي؟

لما تسأل السؤال ده على الملا فجأه بتحصل على كمية انتقادات كيف تقولي كلام زي ده انتي مفروض حياتك تتمحور حول البيت والأطفال هم شهاداتك وهم شغلك.

صح هم أهم شي بس انت بدون ذاتك ولا شي دي الحاجه الأنا مقتنعه بيها والحاولت كتير اوازن بينها وبين امومتي وشفت انهم ابدا ما بيتقاطعو، عادي جدا نكون امهات جيدات وبنفس الوقت بنحتفظ بي احلامنا وانا هنا ما قصدي بالاحلام أو الهوايات انك تكوني افضل زول فيها انا بقصد اننا ما نبعد عن نفسنا ما نبطل نعمل الحاجات البتسعدنا تكون مساحتنا محفوظه وعلى قدر المستطاع تكون صلتنا بس نفسنا موجوده عشان نقدر نكون احسن بنفسنا ولاطفالنا

يمكن ما كل الأمهات عندها نفس الاهتمامات لكننا جميعا محتاجين منطقه أمنة نقدر نعبر فيها بدون أحكام وبدون خوف من تصنيفات المجتمع لينا هل شايفنا امهات كويسين او لا.